Investigador posdoutoral, artista plástico visual e docente. Doutor en Belas Artes (Universidade de Vigo, 2010). Licenciado pola Especialidade de Pintura (Universidade de Vigo) e Premio Fin de Carreira (2004). Forma parte do grupo de investigación dx5 desde o ano 2005. Na actualidade dirixe a liña de investigación titulada «Estudos transdisciplinarios sobre cómic (ETC)» deste grupo de investigación; ademais, os seus estudos céntranse no cómic de campo expandido, o manga e o anime en España desde unha perspectiva teórica. Bolseiro do Japan Foundation’s Japanese Studies Program (2012) e investigador posdoutoral convidado na Escola de Estudos de Posgrao da Facultade de Manga (Kyoto Seika University, Xapón, 2014-2016). Membro da ACDCómic (Asociación de Críticos e Divulgadores de Cómic de España) desde a súa fundación e autor dos libros Manga. Del cuadro flotante a la viñeta japonesa (2010), A Ding in Japan (2008) (ambos publicados pola editorial Comanegra) e Japón para Otakus (Diábolo Edicións, 2018).

Con case un centenar de exposicións (tanto individuais coma colectivas) en galerías e en centros de arte, a súa obra está presente na nova escena artística española, e foi seleccionado e premiado en diversos certames nacionais e internacionais, entre os que se atopan o Festival Internacional da Imaxe (FINI) de México (2015, 2016); o Certamen de Artes Plásticas Isaac Díaz Pardo (2009, 2011, 2013, 2017); a Bienal Iberoamericana de Obra Gráfica Cidade de Cáceres (2011); ou o Certamen de Arte Gráfico para Jóvenes Creadores de la Calcografía Nacional (2007, 2008, 2009, 2010), entre outros.